हिंजवडी:सायबर गुन्हा: दाम्पत्याच्या बँक खात्यातून तब्बल चार लाख 78 हजार रुपये गायब
बँकेचा प्रतिनिधी बोलत असल्याचे भासवून एक मेसेज केला व त्या व्यक्तीने एका दाम्पत्याला मेसेजमधील लिंकवर क्लिक करण्यास सांगितले. कोणताही विचार न करता लिंक क्लिक केली व दाम्पत्याच्या बँक खात्यातून तब्बल चार लाख 78 हजार रुपये काढून घेत त्यांची फसवणूक करण्यात आली. हा प्रकार एक मार्च रोजी बावधन येथे घडला.
याप्रकरणी 52 वर्षीय महिलेने सुमारे तीन महिन्यानंतर शनिवारी (दि. 27) हिंजवडी पोलीस ठाण्यात फिर्याद दिली आहे. त्यानुसार 8987904192 या मोबाईल फोन क्रमांक धारकाच्या विरोधात गुन्हा दाखल करण्यात आला आहे.
आरोपीने तो बँकेचा प्रतिनिधी असल्याचे भासवून लवकरात लवकर पॅनकार्ड अपडेट करा नाहीतर बँक खाते बंद होईल, अशी भीती घालणारे टेक्स्ट मेसेज वारंवार केले.
त्यानंतर फिर्यादी आणि त्यांच्या पतीला मेसेजमधील लिंकवर क्लिक करण्यास भाग पाडले. दोघांनी मेसेज मधील लिंकवर क्लिक केले असता फिर्यादी यांच्या बँक खात्यातून 88 हजार आणि त्यांच्या पतीच्या बँक खात्यातून तीन लाख 90 हजार 300 रुपये असे एकूण चार लाख 78 हजार 300 रुपये काढून घेत त्यांची फसवणूक करण्यात आली. हिंजवडी पोलीस तपास करीत आहेत.
