पिंपरी चिंचवड महानगरपालिकेच्या प्राथमिक, माध्यमिक शाळांमधील विद्यार्थ्यांना शालेय साहित्याचे पैसे मिळणार थेट बँक खात्यावर
प्राथमिक, माध्यमिक शाळांमधील विद्यार्थ्यांना शालेय साहित्याचे पैसे थेट बँक खात्यावर (डीबीटी) 1 जुलैपर्यंत देण्याचा निर्णय पिंपरी-चिंचवड महापालिकेच्या वतीने घेण्यात आला आहे.
शासनाच्या पारदर्शक धोरणाचा भाग म्हणून हा निर्णय घेण्यात आला आहे त्याचा थेट फायदा विद्यार्थांना मिळेल.मागील शैक्षणिक वर्षी डीबीटीचा निर्णय होऊ शकला नव्हता.
दरवर्षी महापालिकेच्या वतीने दोन शालेय गणवेश, एक पीटी गणवेश, एक स्वेटर, एक रेनकोट दिला जातो. तसेच शालेय साहित्यामध्ये दप्तर, वह्या, पुस्तके, बूट, प्रयोगवही व इतर साहित्य दिले जाते. या विविध साहित्यांचे वाटप न करता त्याचे पैसे विद्यार्थ्यांना देण्याचा निर्णय शिक्षण विभागाने घेतला. शिक्षण विभाग प्रथमच विद्यार्थ्यांसाठी डीबीटी करणार आहे.
महापालिकेच्या 105 प्राथमिक तर 18 माध्यमिक शाळा आहेत. या शाळांमध्ये सुमारे 50 हजार विद्यार्थी शिक्षण घेत आहेत या सर्वांना त्याचा फायदा होणार आहे.
दप्तर, रेनकोट, काळे बूट, पी.टी शूज, मोजे, पाणी बॉटल, कंपास पेटी, व्यवसायमाला, स्वाध्यायमाला, चित्रकला वही, नकाशा, 100 आणि 200 पानी वही या साहित्याचे बाजारातून दर घेतले असून त्यानुसार पहिली ते चौथीपर्यंतच्या विद्यार्थ्यांना तीन हजार पाचशे रुपये तर पाचवी ते दहावी पर्यंतच्या विद्यार्थ्यांना तीन हजार सातशे रूपये देण्यात येणार आहेत. हे पैसे विद्यार्थ्यांच्या अथवा पालकांच्या बँक खात्यावर जमा करण्यात येणार आहेत.
