शरद पवारांना ठार मारण्याची धमकी प्रकरणात नवी माहिती समोर
राष्ट्रवादी काँग्रेसचे अध्यक्ष शरद पवार यांना सोशल मीडियावरून ‘तुमचा दाभोलकर करू’ अशी जिवे मारण्याची धमकी देण्यात आली होती. याप्रकरणी सागर बर्वे (३४) याला पुण्यातून अटक करण्यात आली दरम्यान, सागर बर्वेने दिलेल्या धमकी प्रकरणात आता नवी माहिती समोर आली आहे. केवळ लग्न जमत नसल्यामुळे एका तरुणाने राष्ट्रवादी काँग्रेसचे अध्यक्ष शरद पवारांना ठार मारण्याची धमकी दिल्याचे पोलिस तपासात समोर आले आहे.
‘राजकारण महाराष्ट्राचे’ या फेसबुक पेजवरून आणि नर्मदाबाई पटवर्धन या नावाच्या फेक अकाऊंटवरून ही धमकी देण्यात आली होती. सागर बर्वे हा तरुण अविवाहित असून कोणत्याही राजकीय पक्षाशी तो निगडित नसल्याचे समजते. काही केल्या त्याचे लग्न जमत नव्हते. त्यात महाराष्ट्रात अचानक औरंगजेबाच्या फोटोवरून वाद निर्माण झाला.
आरोप-प्रत्यारोपाच्या फैरी रंगत गेल्या. या साऱ्याचा राग येऊन त्याने ही धमकीची पोस्ट लिहिली. याशिवाय यामागे आपला कोणताही हेतू नसल्याची माहिती सागरने पोलिसांना दिली आहे.
